Dünən Çin Xalq Respublikasının paytaxtı Pekində XXIX Yay Olimpiya oyunlarının açılış mərasimi keçirilib.“Quş yuvası” adlanan stadionda keçirilən təntənəli açılış mərasimi üç saat davam edib.
Mərasimdə 80-dən artıq ölkənin dövlət və hökumət başçıları, o cümlədən Azərbaycan prezidenti İlham Əliyev də iştirak edib.
Ev sahibləri tərəfindən nümayiş olunan Çin rəqsləri və kliplərindən sonra Olimpiadada iştirak edən 205 komandanın paradı keçirilib. Paradın önündə Yunanıstan, sonunda isə Çin milli komandası keçib. Daha sonra Olimpiya çempionu Li Nin Olimpiya-2008-in məşəlini yandırıb.